Brow Brow

訓左6、7個鐘頭火車 終於到左青海省的大城市西寧喇!

琴日係我地第一次係呢個Trip入面訓火車 雖然我地買左硬卧 但係同天水果程一樣 硬卧訓落去其實都好舒服

火車入面D野其實都好齊 有洗面間、廁所 周不時仲會有服務員推住架車仔賣各種食品同日用品

落左火車之後 我地第一件事就係要狗衝去今晚會住既賓館 - 藍卡維賓館

呢間賓館係黎緊幾日會同我地一齊玩既包車馬師傅幫我地訂既

馬師傅真係相識滿天下 我地一入到去陣係撻佢個名出黎 一間雙人房即刻變左100蚊一晚 平左成半

間房仲要Quality唔錯 有好大又乾淨既廁所

我地好快咁沖左個涼 又等埋葉生老立佢地係入面爆埋個石 無錯 係爆石

經過呢幾日既行程之後 我地明白到係內地要搵到一個乾淨而舒適既廁所比你培養屎氣係幾咁得黎不易

所以見到個咁正既廁所又點可以放棄呢個機會

如是者又過左一陣 我地終於準備就緒出發

我地今日既行程都幾趕 雖然我地只係去一個地方 但果個地方距離市區有成個幾鐘既車程 而且入面好多野睇

佢就係塔爾寺啦

西寧汽車站有公交坐過去塔爾寺 車程個零鐘 收費係25蚊

不過架車沿途無報站 搞到我地過左龍落車 要行返成1km返去

好彩有百度地圖定位 不過我地發現原來有2條路去到塔爾寺 而我地係行緊一條好長好兜既路 lol

最衰都係葉生點我地行呢條路 搞到我地係烈日下暴曬多半粒鐘先到

不過呢條路沿途會經過一個藏族市集 入面賣既野都幾有特色

塔爾寺係呢個絲路入面比較多藏傳佛教特式的寺廟 岩哂我地呢D對藏佛有興趣但又唔順路玩埋西藏既人睇

佢同好多我地平時見到既傳統佛廟唔同 佢係由一座座佛教建築物組成既一個建築群 成個城堡咁

而事實上佢真係成個城咁大 入面乜都有 有負責饍食既廚房、寺廟式既醫院、一座座比係入面修行既人住既民房

應有盡有 入左去修行既話真係完全可以做到自給自足 成世留係度唔出黎都無問題

當然唔少得既仲有一座座供奉住大佛像既大佛殿啦

藏傳佛教有所謂既3大聖物 就好像基督教講既3位一體咁 分別係 佛寺 經書 同埋念經既地方 三者缺一不可

而佛教信有輪迴 姐係人死後會有下一世

我地係入面聽得最深刻既一個故事就係講有一個藏佛既代表人物唔知第幾世斑禪同佢既師傅個樣好似

原來咁係因為每位大師係臨死之前都會托人周圍搵自己下一任既傳人 而呢個人就係自己既上一世 所以個樣會有相似

另一樣比較有特色既就係大部份寺廟入面都有好多細細個既金身佛像 數量有成千個咁多 每個個樣望真D都會發覺有D唔同

呢個就係所謂既千佛像 佢係象徵佛教入面 人人都有自己既本尊佛 人人都可成佛 呢個思想

相方面呢到就無辦法提供 因為入到佛廟內部係嚴禁拍照 所以大家有機會黎既話不妨留意下

仲有一樣相信大家都成日會係電視節目見到既就係呢一個個既轉輪

佢地每一個上面都刻左字 其實係D經文黎 好似話轉左一圈就等於你念左一次個經文

不過一定要向順時針轉 轉錯左你就......

塔爾寺入面其實真係好多野睇 可惜時間太緊迫 好多大殿陣係入去轉左個圈就出黎 想同D佛像神交多一陣都無時間

我地就咁將所有大殿行一轉 已經到左下午3點幾 又係時候坐返車返去

返去既時候由於懶得行1km出去坐返公交 所以我地就咁係門口出面坐黑車

無錯係黑車 經過呢幾日既經歷 我地已經可以輕鬆Carry呢d黑車 知道邊D伏邊D唔伏 邊D坐得邊D唔坐得

上車前我地同司機講定40蚊4個人 佢會將我地送返去市區既西門

坐私家車雖然有D貴同好似好伏 但勝左夠快 唔洗半個鐘就返到市區

落車既位置正正就係最多野食既西門 入面有條地下美食街 兩邊都佈滿各種清真美食

不過我地無叫好多野食 因為諗住夜晚去呢到出名既一條美食街 - 莫家街

所以我地返到酒店之後 沖個涼大約2個鐘之後又出過黎食野

但去到先發現原來莫家街無想像中咁多野食 我地本身以為佢似係西安果D路邊大排檔

但原來成條街得D鋪頭食肆 不過我地總算搵到間唔錯既 叫馬忠XXX

查實呢度D食店都好得意 間間個名都叫馬忠XXX 到底馬忠係乜野黎架呢?

我地入去既呢間馬忠係一間好大 類似香港大食代既食店 入面有好多細細間賣唔同食物既檔

買野食之前要去門口counter度充值一張美食卡先可以到呢D檔度叫野食

我地充值左100蚊 但最後退卡既時候仲有10幾蚊淨! 我地個個都食到好飽

最後就係莫家街搵到呢間係網上都幾出名既正宗酸奶食個飯後甜品 perfect池