Brow Brow

WRITTEN BY 葉生 & Joanna

今日我地行程既豐富又簡單, 就係兵馬俑、兵馬俑同埋兵馬俑啦

點解豐富呢? 因為我地係經過九九八十一劫難先去到呢個離西安市區個零鐘車程既地方

是咁的, 話說今日我地晨咁早就彈起身去西安火車站找公交去兵馬俑啦

點知我地一落車, 就即刻有幾個人圍埋黎(後來知佢地係一夥), 當中有一個大媽係咁一輪嘴同我地講野

佢話佢地有車去兵馬俑同埋其他西安有名既景點(睇佢比我地果張卡片入面一共有6個景點)

入世未深既我地當然不虞有詐, 聽佢地講話係大巴, 咁個價錢又唔貴(15蚊一個)

咁我地心諗就費事再搵公交, 所以就比左錢

比完錢之後佢格離有個後生仔叫我地跟佢走, 果時都覺得有D奇怪

行到一條巷附近, 先發現原來佢用一架私家車車我地去景點, 我HI, 咁咪姐係黑車, 架車仲要真係黑色......

不過我地諗黑車都無乜大不了, 去到兵馬俑就得啦

點知上車之後, 我地再問個司機係咪去兵馬俑果時, 佢面色一沉, 之後反問我地, 乜唔係至少去2個景點咩

之後佢極力推薦另一個景點叫咩溯源‧ 秦始皇陵,  佢話咩我地呢到人係習慣「先拜皇帝後閱兵」, 言下之意姐係要去埋個溯源

但呢個景點完全係垃圾黎, 因為佢比我地睇果張小冊子入面寫明, 佢係用3D特技將秦始皇既陵墓重現出黎, $128睇個假野有咩意思

所以我地同佢理論 , 坐係車頭既老立當時嚇到鼻哥Loong都無肉 

最後個司機話唔車我地, 原來我地頭先比果每人$15車費個司機係一個仙都無

佢車我地, 要回成本既話, 係要送我地去講好左既景點入面買飛佢先會有佣收

姐係話如果我地陣係去兵馬俑而唔去秦始皇陵既話, 佢回唔返D油錢, 所以就唔車

不過佢都好心, 起碼佢都肯送返我地去車站, 我地最多都係蝕左D時間

而最神奇既係當我地問個大媽回水果時, 佢地竟然二話不說比返我地! 拎得返D錢真係全靠勇敢既Joanna

件事去到呢度其實已經好Chur, 因為我地前後哂左一個鐘原地踏步

咁岩退左錢之後, 我地係附近見到有幾個女仔, 佢地都好似搵緊公交(306號）, 所以我地就同佢地一齊去搵

最後終於比我地發現左個公交站! 就係個火車站門口右手邊

當我地就行到個306公交站果時, 我地見到個306號巴士詢問處, 出面有勁多司機同一個著住制服，手掛306號牌既職員

一問之下, 我HI, 原來佢地又係黑車佬, 話$10送我地去兵馬俑

原來連著住公交服既司機都有假

佢地話而家306改左線, 一定要所有人係華清宮落, 先再去得兵馬俑

簡單啲黎講即係306唔搭得咖喇, 搭我地啲黑車啦

正當我地比佢地既花言巧語引到我地就中伏既時候, 頭先撞到果班女仔二話不說

一隻手拉住我地, 我地回頭一看, 發現原來真正既公交車就係前面! 而且佢準備開車

於是我地一個箭步沖到過去, 終於上到車

車費仲要只係$7!

為左報答班女仔既好心, 我地同意同佢地(一共7個人)一齊請一個導遊(要$100)

其實個導遊都伏伏地, 佢係咁遊說我地要我地租個耳機($20一個人)

佢話入面會好多人, 7個人一團我地未必會聽得清楚
好彩我地比人伏左咁多次, 總算鍛鍊左d危機意識, 我地即刻懷疑租耳機果度其實同佢有利益輸送

所以我地堅決拒絕, 佢仲吹到話到時入去聽唔到就後悔都無用

而事實證明左我地係岩, 因為一黎入面其實無佢所講咁多人, 二黎入面一D都唔嘈, 我地係完全可以聽到佢講既野

甚至乎其實我地可以聽到格離導賞員講既野, 根本唔請佢都得

不過既然比得錢 當然要落充耳力聽啦

聽佢講原來呢個兵馬俑只係開發左3分之1, 仲有大量既其實仲係泥土下面, 因為起左一個兵馬俑之後仲有好多工序

D考古學家係要先將爛到變成碎片既兵馬俑拎出去第2個位置, 之後將佢重組還原, 最後先將佢放返原位

因為氧化既問題, 其實現時大部分見到既灰黑色兵馬俑並唔係佢原本既樣, 佢地本身係有D紅色染料係上面

而出土至今唯一一個仲保存有顏色係身既兵馬俑, 就係呢個跪射俑

之後我地去埋另外2個展館參觀, 呢個景區Total有4個展館, 當中3個(包埋頭先果個)入面都係有兵馬俑

而呢2個展館入面既兵馬俑明顯地無頭先果個咁多咁壯觀, 不過聽講入面既俑都係比較高階, 睇落似係司令室

不過最後戈幾個女仔無啦啦m痛，因為行動不便，所以個導遊就走人唔同我地睇埋最後果個珍寶館

 最後我地發現呢張$75既學生門票原來係包埋真正既秦始皇陵! 而且係兵馬俑外既大門口係有免費車可以坐過去

不過佢個墓係係個山上面, 而我地只係可以係山腳附近遊覽, 好似話係因為2年前D遊客素質太差搞到佢封閉左

好喇講番秦始皇陵，戈道仲提供埋免費導賞團添！

我地跟個導遊勁似陳小春，講解既時候仲成日拋啲勁深奧，勾起人curiosity 既問題之後轉身走人，迫我地成日追住佢黎問點解，咁佢當然會企係道慢慢同你解釋啦

無記錯佢編號係06，即刻想去表揚下佢！！

陳小春話西安好出名「兩看兩拜兩朝聖；三吃三帶三不帶」

而其中既3吃, 就分別係當地既biangbiang麵（個字難到唔識打, 不過有圖）、泡膜同夾膜

一場黎到西安又點可以無試過當地野食就走架呢? 所以完左兵馬俑之後我地就即刻狗沖去回民街 一口氣試哂佢!  

至於咩叫 兩看兩拜兩朝聖；三吃三帶三不帶，自己上網search la